Bizkaiko Foru Aldundiak lurraldean arkeologia- eta paleontologia-ikerketetarako dirulaguntzen deialdi bat onartu du, 80.000 euro guztira. Eta, bestetik, 350.000 euroko dirulaguntzak, balio historikoak eta arkitektonikoak zaintzeko, kultura-intereseko eraikinak zaharberrituz eta kontserbatuz.
Bizkaiko Foru Aldundiak bi dirulaguntza deialdi onartu ditu, lurraldearen balio historiko eta arkitektonikoak zaintzen laguntzeko. Guztira 430.000 euro dira, bi deialditan banatuta.
Lehenengoak 80.000 euroko partida du, eta bere helburua da Bizkaiko ondare historiko-kulturala kontserbatu, ezagutzera eman eta kudeatzea, ikerketak sustatuz, aztarnategi arkeologikoak babestuz, eraikuntza historikoak aztertuz eta dokumentatuz, eta ezagutarazten lagunduz.
Era berean, foru-erakundeak sostengatu nahi ditu ikerketa arkeologikoaren eremuan dihardutenak, eremu hori funtsezkotzat jotzen baita Bizkaiko ondare historikoa balioesteko. Besteak beste hauek dira diruz lagun daitezkeen jarduerak: prospekzio arkeologikoa, indusketa, zundaketa, labar-artearen azterketa, kontrol arkeologikoa, azterketa estratigrafikoa eta jarduera paleontologikoak.
Bigarren deialdiaren (350.000 euro) helburua, berriz, Bizkaiko kultura-ondare higiezinaren zaharberritzea, kontserbazioa eta sendotzea sustatzea da, eta, horrela, ondare horren balio historiko eta kulturalen babesa bermatzea.
Bi dirulaguntzetarako eskabideak aurkezteko epea apirilaren 11tik 30era egongo da zabalik. Erakunde interesdunek Bizkaiko Foru Aldundiaren egoitza elektronikoaren bidez izapidetu ahal izango dituzte eskabideak (www.ebizkaia.eus).