Aurten ere Museoen Nazioarteko Eguna Bizkaian ospatuko da programazio berezi eta doako sarrerekin Bizkaiko museo gehienetan, gainera tailer ezberdinak antolatuko dira aire zabalean eta lurraldeko 45 museoak egun bakar batean ezagutzeko aukera izango da. Ekimen honi buruzko informazio guztia, baita Bizkaiko museoen eskaintza ere, museoeneguna.eus webgunean dago eskuragarri.
Kulturgune horreek, museoek, gure gizartean betetzen daben funtsezko zereginaren hausnarketa sustatzen duen eguna da
Datorren maiatzaren 18an, Bizkaiak bat egingo du Museoen Nazioarteko Egunarekin, Bizkaiko museo-eskaintza aberatsa eta askotarikoa herritarrei hurbiltzeko proposamenarekin. “Bizkaia Museoz Museo, aukeratzeko beste” lelopean, Bizkaiko Foru Aldundiak, lurraldeko museoen ordezkaritza zabalarekin batera, maiatzaren 18an egingo diren ekimenak aurkeztu ditu.
Leixuri Arrizabalaga Euskara, Kultura eta Kirol foru diputatuak azpimarratu duenez Museoen Nazioarteko Egun hau ez da soilik kulturaren ospakizun bat. Kulturgune horreek, museoek, gure gizartean betetzen daben funtsezko zereginaren hausnarketa eta aintzatespena sustatzen dauan eguna da, hain zuzen be. Gure historiaren, kulturaren eta nortasunaren zantzuak dira. Eta aukera aprobetxatu zuen lurraldeko museo-eskaintzari balioa emateko eta Euskararen Etxeak Europako 2025eko Museo Onenaren Europako Kontseiluaren eskutik jaso berri duen saria gogoratzeko.
Bizkaian, Foru Erakundeak Museoen Nazioarteko Eguna ospatzeko ekimena antolatu du maiatzaren 18an Abandoibarran, Evaristo Txurruka kaian, Bilbon. 11:00etatik 19:00etara, ikusentzunezko pieza batez gozatzeko aukera izango dute bertaratzen direnek. Bertan, lurraldeko 45 museoetan barrena ibilbidea egin ahal izango dute, egun batean museoen aniztasuna eta aberastasuna ezagutzeko aukera emanez. Gainera, Bizkaiko museo-eskaintzari buruzko materialak banatuko dira.
Gune horretan bertan, maiatzaren 18an, 5 eta 11 urte bitarteko haurrei zuzendutako tailerren gune bat jarriko da, museoekin lotutako sorkuntza- eta hezkuntza-jardueretan parte hartu ahal izateko. Tailerrak 11:00etatik 15:00etara egongo dira zabalik. Parte hartu nahi dutenek tailerren gunera hurbildu eta izena eman beharko dute, parte hartzea librea da aforoa bete arte.
Abandoibarrako jarduerez gain, Bizkaiko museoek jarduera bereziekin eta doako sarrerarekin ospatuko dute eguna museo gehienetan. Programatutako jarduerei eta museo parte-hartzaileei buruzko informazio guztia museoeneguna.eus webgunean dago eskuragarri.
Bizkaiko Museoen Nazioarteko Eguna gure historia, artea eta kultura zaindu eta partekatzeko guneak ezagutzeko eta haietaz gozatzeko gonbidapena da. Ikasteko, hausnartzeko eta gure nortasunarekin konektatzeko aukera bat, gure lurraldeko museo-aberastasunaren bidez.
Maiatzaren 18an ospatuko den Museoen Nazioarteko Eguna dela eta, Bizkaiko museoek askotariko kultur programazioa prestatu dute ate irekien jardunaldiekin, bisita gidatuekin, tailerrekin, kontzertuekin eta publiko guztientzako jarduerekin.