Busturiko Udalak udalerriko hainbat bide asfaltau eta konpontzeko proiektua gauzatu dau. Zehazki, Ispilluetako zubitik Txakurren Kanposantue izeneko guneraino doan bidean eta Iturriondo eta Abiñaburuko etxebizitzak lotzen dauzen tartean jardun da. Jarduketa hauek udalerri osoan irisgarritasun ona izateko estrategiaren barruan dagoz.
Busturiko Udalak herrian paseatzeko edota bertokoen kotxeekaz asko erabilitako bi bideko zorua konpondu eta asfaltau barri dau. Bi jarduera hauek herriko bide-azpiegituren segurtasuna eta irisgarritasuna hobetzeko helburuaren barruan sartzen dira. Helburu hori Gobernu Taldearen legegintzaldiko konpromisoan jasotzen da, eta horretarako urtero partida bat bideratzen dau udalak hiri- eta landa-bideak mantentzeko, konpontzeko eta barriro asfaltatzeko.
Lehenengo jarduketa Ispilluetako zubitik Txakurren Kanposantue izeneko guneraino doan tartean egin da. Bidea errepide orokorrarekiko ia paraleloan doa, baina barruko albo batetik, Arrotegi zaharren egoitzaren atzealdera eta aparkalekura eta hainbat etxebizitzatara eramaten dauena. Auzo-bide hau egoera txarrean egoan (zuloak, arrakalak, etab.), eta, horregaitik, zoladura berregokitu behar zan, istripuak saihesteko eta segurtasuna bermatzeko.
Jarduketa hau egiteko Iberdrolak inguruko aireko linea lurperatzeko lanak amaitzearen zain egon da udala, baita Bilbao Bizkaia Ur Partzuergoak hornidurarako hodi barriak instalatzeko egindako lanak amaitzeari be.
Bestalde, Busturiko Udalak konpondu egin dau Iturriondoko trenbide-pasagunetik Abiña-buruko etxebizitza-guneraino doan bidea. Ibiltariak eta auzo-ibilgailuak asko erabilitako bide hau konpontzea beharrezkoa zan, batez be obrako ibilgailu astunen joan-etorriagaitik.
Egindako jarduketetarako 48.400€-ko inbertsioa egin da, besteak beste, zoladura konpondu eta barritzeko, errepideak asfaltatzeko, oinezkoentzako pasabideak egokitzeko, kanalizazinoak aldatzeko, pasabide goratuak egiteko eta seinale horizontalak jartzeko.