Hondartzetako larrialdi edo gertakarietan (itsas erreskateak, isurketa kutsagarriak…) jarduteko protokoloak Karraspio hondartzan (Mendexa) probatu dira, Bizkaiko hareatzen etengabeko hobekuntza sustatzen duen hondartzak kudeatzeko sistema integratuaren esparruan.
Aurten, berriro ere, Bizkaiko Foru Aldundiko Natura Ingurunearen Sailaren eta Eusko Jaurlaritzako Segurtasun Sailaren arteko lankidetza probatu da larrialdi-simulakroa. Aurten Mendexako Karraspio hondartzan egin da eta emaitza oso ona izan da.
Simulakro horretan, kostaldeko larrialdiei aurre egiteko zerbitzuen arteko koordinazio-mekanismoak eraginkorrak direla erakutsi da, Foru Aldundiak Bizkaiko hondartzetarako daukan kudeaketa-sistema integratuaren bitartez. Oraingo honetan, simulakroan bi jarduketa egin dira: bi pertsonaren itsas erreskatea eta isurketa kutsagarri bat.
Larrialdi bikoitzeko simulakroa
Jarduketa 11:00etan hasi da, hondartzako sorosle-zerbitzuak Euskadiko Larrialdiak Koordinatzeko Zentroari (SOS Deiak) jakinarazi dionean itsasontzi txiki bat hondoratzen ari zela, bertan gutxienez bi pertsona zeudela. Kostalde-salbamenduko protokoloa aktibatu eta Larrialdiei Aurre Egiteko Euskal Sistemaren baliabideak berehala heldu dira inguru horretara.
Minutu batzuk geroago, Ertzaintzak eta sorosleek jakinarazi dute orban kutsatzaileak agertu direla hondartzan, eta, horregatik, Foru Aldundiko hondartzetako garbiketa-zerbitzuek, Istripuen Prebentzio, Sorospen eta Laguntzarako Zerbitzuak eta Eusko Jaurlaritzako Osasun Publikoko Zerbitzuak koordinatuta esku hartu behar izan dute.