Iturria: Irekia
- Portuetako 15 kontseilu: 8 Bizkaian eta 7 Gipuzkoan
- Amaia Barredo: “Irailetik aurrera, itsaso eta lehorraren arteko jabari publikoa kudeatzeko eskumen berria sartzeko deialdia egingo dugu”
Amaia Barredo Eusko Jaurlaritzako Elikadura, Landa Garapen, Nekazaritza eta Arrantzako sailburuak adierazi duenez, “irailetik aurrera Portuetako Udal Kontseilu sortu berriak deituko ditugu berriro itsasertzeko udalerri bakoitzean, eta gai berri bat sartuko dugu mahai gainean: itsaso eta lehorraren arteko jabari publikoaren kudeaketa, sailak 2025eko apirilaren 1etik aurrera bere gain hartu berri duen eskumena”. “Helburua da portuaren eta herriaren arteko harremanak bultzatzea, lankidetzaren eta akordioen bidez”.
Euskadiko portuetako herrien eta haien portuetako espazio eta jabarien artean harreman, koordinazio eta lankidetza hobea eta arinagoa garatzeko asmoz, 2025aren hasieran, 15 Portuetako Udal Kontseiluak eratu ziren: 8 Bizkaian eta 7 Gipuzkoan.
Amaia Barredo Elikadura, Landa Garapen, Nekazaritza eta Arrantzako sailburuak herri eta portu arteko harremana sustatzeko hartutako konpromisoa lehen fruituak ematen ari da, esaterako, gune horien erabilera ordenatua portuko udalerri horietako tokiko jaietan.
Amaia Barredok zehazten duenez, “Portuetako Udal Kontseiluek topagune gisa balio dute hainbat gai jorratu eta koordinatzeko, besteak beste, hauekin lotutakoak: Eusko Jaurlaritzak, udalek eta beste erakunde batzuek burutu beharreko obrak –dikeen eta kaien hobekuntza-lanak eta klima-aldaketari eta itsas mailaren igoerari aurre egiteko jarduketak– eta gure portuetako arrantza-jarduera eta itsas aisialdiari lotutakoa”.
Portuetako Udal Kontseiluek herritarren eguneroko bizitzan eragina duten gaiak ere jorratzen dituzte, udalerri horietako portu asko “plaza” bihurtzen baitira beren komunitatearen eguneroko bizitza garatzeko”.
Adibideak
Portuko Udal Kontseiluen lana lehen fruituak ematen hasi zen: Ondarroan, portu-jabariko 35.000 m2-ko lagapenarekin, portuko jarduera nagusian sektore-jarduerarik erregistratzen ez zutenak. Akordioak gune horren erabilera publikoa bermatzen du, auzotarren onurarako.
Portuko lur horiek erabiltzeari utzi zitzaion, eta orain udalerriarekin lankidetzan kudeatzeko lagatzen dira. Gainera, Ondarroan espazio egokia egokitu da portu-eremuan heliportu bat egiteko, OSAKIDETZA-Larraldi zerbitzuek eta osasun-zerbitzuek ebakuazioa egin dezaten. Era berean, segurtasun-gaiei heldu ondoren, baimena eman da herriko jaietan kaiko 1.126 m2 erabiltzeko, hegoaldeko ubidean, jolas-atrakzioetarako, eta beste 428 m2 arrain-lonjako plaza publiko berrian karpak, agertokiak eta puzgarri-jolasak jartzeko.
Antzeko kasua da Elantxobekoa. Orain, lankidetza-tresna berriari esker, udalerriak heliportu bat du Osakidetzako ospitaleetara ebakuatzeko, portuko espazioak erabilita, eta Magdalenetako herriko jaietan garbiketa-lana egin da, portuko eremuan 9.020 kilo hondakin baino gehiago bilduta.
Hondarribian ere 2025eko urtarrilaren 29an Hondarribiko Portuko Udal Kontseilua eratu izana nabarmendu zuen. Eusko Jaurlaritzako Portuen Zuzendaritza lanean ari da udalerrian akordio berri bat egiteko portuko gune jakin batzuk erabiltzeari dagokionez, lankidetzaren bidez, jatorrizko erabilera galdu duten portu-jabariko espazioen erabilera bermatzeko.
Getarian 90 aparkaleku prestatu dira portuko espazioan udako, udalerriak udan bereziki izaten dituen trafiko-arazoak direla eta.
“Ekimen horiek eta beste batzuk sortu berri diren Portuetako Udal Kontseiluetan koordinazio- eta elkarrizketa-mahaiak abian jartzearen barruan kokatzen dira, bai eta Eusko Jaurlaritzako Elikadura, Landa Garapen, Nekazaritza eta Arrantza Sailak udalerrien eta portuen arteko harremana areagotzeko eman duen bultzadaren barruan ere”, adierazi du Amaia Barredok.