Bizkaiak 45 agente eta baliabide tekniko bidali ditu Gaztela eta Leonera, baso-suteak itzaltzen laguntzeko
Bizkaiko Foru Aldundiak Suhiltzaileen nahiz Mendietako Zerbitzuetako, eta Basalan foru-en presa publikoko langile espezializatuak mugiarazi ditu. Operatiboa gaur goizean atera da Uriosteko parketik; horrekin batera, 18 ibilgailu, material espezifikoa, sastrakak kentzeko robot bat eta behaketa-drone bat eraman dituzte.
Bizkaiko Foru Aldundiak 45 pertsona eta hainbat baliabide teknikoko kontingentea bidali du gaur, Estatuko hainbat gunetan kaltea eragiten duten baso-suteak itzaltzen laguntzeko. Mobilizazioa Gaztela eta Leongo Erkidegoak Eusko Jaurlaritzari laguntza eskatu ondoren egin da, larrialdietako erakunde arteko lankidetzaren esparruan.
Konboia Uriosteko foru parketik abiatu da gaur goizean, Leongo Boca de Huérgano (Riaño inguruan) udalerrira joateko. Dispositibo hori Prebentzio, Su Itzaltze eta Salbamendu Zerbitzuko (PSSZ), Mendi Zerbitzuko eta Basalan foru-en presa publikoko langileek osatutakoa da.
Langile parte-hartzaileak eta baliabide materialak
Eramandako laguntzaren barruan Bizkaiko suteen prebentzio eta itzalketako eta salbamenduko zerbitzuetako 15 kide daude (10 suhiltzaile, 2 kabo, sarjentu 1, ofizial 1 eta ikuskatzaile 1), esku hartzeko 8 ibilgailu daramatzatenak. Ibilgailu horien artean honako hauek doaz: basoko bi ponpa astun, bi zisterna, lur orotako bi pickup, aginte-ibilgailu bat eta furgoneta logistiko bat.
Horiekin batera, Mendi Zerbitzuko 10 profesional ere gehitu behar dira, eta horien artean suteak itzaltzeko 3 zuzendari tekniko daude, 6 baso-agente eta laguntzaile bat; baita Basalaneko 20 pertsona ere (2 teknikari eta 18 baso-espezialista).