Iturria: Irekia
Amaia Barredo: “Aginduak atun mojaren arrantzarako baimendutako ontzien errolda berezi bat ezartzen du, Afrikako uretan Dakarren basea duten kanaberako atunontziak biltzen dituena”
Eusko Jaurlaritzako Elikadura, Landa Garapen, Nekazaritza eta Arrantza Sailak 160.000 euro emango ditu Europar Batasunaren eta Senegalen arteko akordioaren amaierak eragindako arrantza-ontzientzako laguntzetarako. Amaia Barredo sailburuak azaldu duenez, “2020ko Aginduak Ozeano Atlantikoko atun mojaren arrantza arautzen du, eta errolda berezi bat ezartzen du Afrikako uretan Dakarren basea duten kanaberako atunontziak biltzen dituena, atun mojaren arrantzarako baimendutakoak”.
“Ontzi horiek EBren eta Senegal´en arteko Arrantza Jasangarrirako Lankidetza Akordioaren Protokoloaren indarraldiarekiko erabateko mendekotasuna dute. Izan ere, beita-arrantzan aritzen dira, ondoren kanaberareko amuan berdindu ahal izateko, soilik Afrikako herrialde horretako uretan”, zehaztu du Amaia Barredok.
Beita egin eta itsasontzien haztegietan itsasoko urarekin bizirik mantendu ondoren, orduan joan daitezke tunidoen (atun moja) sardak bilatzera, ondoren banan-banan harrapatzeko. Berritu ez den azken protokoloa sinatu zenetik bost urteko indarraldiaren ondoren, Europar Batasuneko flotak ezin du arrantza-jarduerarik egin iazko azarotik.
Bost hilabete baino gehiago igaro ondoren, eragindako flotak ez du inolako diru-sarrerarik lortu, ezin izan baitu arrantzan jardun. Hori dela eta, zuzeneko laguntzak ematea aurreikusten da, diru-sarrerarik eza eta flota horrek Dakarreko portuan geldirik eta amarratuta egon den 5 hilabeteko aldi horretan izandako gastuak neurri batean konpentsatzen saiatzeko.
Laguntzen guztizko zenbatekoa ehun eta hirurogei mila eurokoa da, eta horien onuradun izango dira Euskal Autonomia Erkidegoan egoitza-portua duen arrantza-ontziren baten enpresa armadore diren pertsona fisiko eta juridikoak, baldin eta sartuta badaude “C” zerrendan —Ozeano Atlantikoan Atun Mojaren Arrantzarako Baimendutako Ontzien Errolda espezifikoan— Afrikako uretan DAKARen basea duten atunontzienak. Horrela, laguntza horren onuradun izango dira I. eranskinean jasotako ontziak, eta horietako bakoitzari dagokion zenbatekoa 40.000 €-koa da.