Finantzetako Lurralde Kontseiluak tributu itunduetatik eratorritako udal-finantzaketaren zenbatespena onetsi dau 2026. urterako: 1.206,7 milioi euro izango da, hau da, aurton jasotako zenbatekoa baino 6,71 gehiago (75,9 milioi) eta 2025eko ekitaldiko likidazino-aurreikuspenak baino % 4,23 gehiago. Nahiz eta 2025eko ekitaldiaren itxiera zein izango dan otsailean jakingo dan, aurreikusten da likidazinoa udalentzat positiboa izango dala, 26,9 milioi euro, hau da, egindako konturako ekarpenekiko % 2,38.
Bizkaiko Finantzetako Lurralde Kontseiluak 2026. urtean zehar lurraldeko udalerriei emongo jakezen funtsen zenbatespena onartu dau: 1.206.756.554 milioi euro guztira: 1.195.498.361 milioi euro UDALKUTXAtik eta 11.258.193 milioi Gizarte Zerbitzuen Funtsaren bitartez.
Bi funts horreek % 6,71 gehitu egin dira (75,9 milioi euro), 2025eko ekitaldiko aurrekontuan jasotako zenbatekoen aldean eta % 4,23, 2025eko likidazinoaren aurreikuspenaren aldean (2025eko likidazinoaren barri datorren urteko otsailean izango dogu).
Bileran, funts horreetarako (UDALKUTXA eta Gizarte Zerbitzuen Funtsa) 2025eko likidazino-aurreikuspenak be aztertu dira. Behin betiko datuen barri, Finantzetako Lurralde Kontseiluaren otsaileko bileran izango dogu; halanda be, zenbatetsi da likidazinoa positiboa izango dala (26,9 milioi euro) Bizkaiko udalentzat (% 2,38).
Udalkutxa – Udal Finantzaketarako Foru Funtsaren zenbatekoa erabakigarria da udalek hurrengo ekitaldiko aurrekontuak egin ahal izateko. Udalerrien arteko banaketa, besteak beste, irizpide hauen arabera egiten da: biztanleria, langabezia-tasa, ahalegin fiskala, ikastetxe publikoetako ikasgela-kopurua edo biztanleriaren sakabanaketa.