Bizkaiko Foru Aldundiak, Foru Jauregiaren 125. urteurrena ospatzen jarraitzeko, denentzako doako proposamen barriak ekarriko dauz urte amaierara arte. Agendak barne hartzen dauz bisita musikatuak, historiaren kutxa bat eta mapping argizko ikuskizun bat eraikin historikoaren fatxadan.
Urte hasieratik, Foru Aldundiak hainbat ekintza antolatu dauz Foru Jauregia eta haren historia herritarrei ezagutarazteko. Urteurrenaren barruan, hemendik abendura bitartean doako esperientzia batzuk programatu dira, eraikina eta haren garrantzia ezagutu ahal izan daitezan formatu barritzaileen bidez.
Datorren astean, Jauregiaren paretik pasatzen danak murgiltze-esperientzia batez gozatu ahalko dau, kalean kokatutako historiaren kutxa batean. Bestalde, azaroan eta abenduan, denentzako bisita musikatuak egingo dira Jauregian, bai eta mapping argizko ikuskizun bat be, Jauregiaren fatxadaren gainean proiektatuko dana.
Ekintzak
Datorren astetik aurrera, Jauregiaren ingurunean ibiltzen diranek murgiltze-esperientzia batez gozatu ahalko dabe kalean kokatutako «Historiaren Kutxan». Proposamen horren barruan, herritarrek 18 metro lineal ibili ahalko dabez Jauregiaren barruan egongo balira bezala. Urriaren 27tik azaroaren 10era egongo da erabilgarri, 9:00etatik 19:00etara.
Gainera, efemeride garrantzitsuak gogoratzeko balioko dau, esaterako Foru Berriaren bosgarren mendeurrena eta Kontzertu Ekonomikoaren 150. urteurrena, laster betetzekoa. Ospakizunok balio berezia erantsiko deutsee Bizkaiko sustraiei eta historiari. Proposamenak segida izango dau, ondoren, lurraldeko hainbat udalerritan.
Azaroan eta abenduan, denentzako bisita musikatuen gertalekua izango dira Jauregia. Ibilbide horietan, ordubetez, leku enblematikoak ezagutu ahalko dira, hala nola beiratea, bilkura-aretoa, ispiluen aretoa eta harrera-aretoa, zuzeneko musika jotzen den bitartean. Egunean hiru emanaldi egingo dira, eta saio bakoitzean gehienez 60 lagunek parte hartuko dabe. Nabarmentzekoak dira Bilboko Koral Elkartearen emankizuna -Haurren Korua, Marion Desjacques harpalaria, Marta Ubieta sopranoa eta Koru Sinfonikoa barne-, azaroaren 15ean eta 22an, eta Bilboko Orkestra Sinfonikoaren (BOS) parte-hartzea, abenduaren 13an eta 20an.
Azaroko kontzertuetarako aurretiazko inskripzioa azaroaren 3tik aurrera egin ahalko da www.bizkaia.eus webgunean.
Azkenik, azaroaren 21etik 27ra, mapping argizko ikuskizun batek Foru Jauregiaren fatxada hartu eta modu sortzaile eta irisgarrian kontatuko die Bizkaiko historia oinezkoei.