Kortezubiko Udalak, herriko auzoetako bizilagunen beharrak bertatik bertara ezagutzeko, domeka goizetan egingo dan bilera-erronda barri bati ekingo deutso. Lehenengoa azaroaren 2an izango da, 12:00etan, Oma eta Basondo auzoetan bizi diranekin.
“Auzo bakoitzaren ezaugarriek herritarren eskariak erabat dezbardinak izatea eragin daikee, horregaitik auzoz auzo batzarrak egiten doguz. Udal gobernuarentzat garrantzitsua da zuzenean ezagutzea zeintzuk diran geure bizilagunen beharrizanak, eta bertaratzea errazteko, topaketa hauek domeka goizetan egingo dira. Iradokizunak eta hobekuntza-beharrizanak egin gura dabezenei dei egiten deutset erronda hauetan parte har daiezan eta gure herriko aurrerapenean udalagaz batera lan egiteko” azaldu dau Karmele Enbeita Kortezubiko alkateak.
Auzobatzarretan parte hartzeko ez da beharrezkoa hitzordurik erreserbatzea. Udal ordezkariak bertaratzen diran auzoko guztiekaz batuko dira. Lehenengo auzobatzarra azaroaren 2an izango da, 12:00etan, eta topagunea Lezika taberna-jatetxea izango da. Bertan, Oma eta Basondo auzoetako bizilagunekaz alkartuko dira. Hurrengo egunetarako aurreikuspena honako hau da: azaroaren 9a izango da Santa Ana eta Terlegizko bizilagunen auzobatzarra: Enderikan azaroaren 16a, Idokilizkoa azaroaren 23a eta Elorrixa-Barrutikoa azaroaren 30a. Udalak, udalaren komunikazino-kanalen bidez eta behar besteko aurrerapenaz, jakinaraziko dau ze leku eta ordutegitan egingo diran auzobatzarrak. Era berean, behar dan aurrerapenaz jakinaraziko da aurrez ezarritako egutegian aldaketaren bat gertatzen bada.
Ekimen honen bidez, udalaren eta herritarren arteko distantziak murriztu gura dira, erraztasunak emon eta kortezubitarrek udal gobernu taldeagaz zuzenean komunikatzeko aukerak zabaldu. Gainera, Karmele Enbeita alkateak, ezustekorik ezean, bariku goizetan eta asteko beste une batean beharrezkoa bada, eskatzen daben bizilagunei arreta emoten deutse udaletxean.