Eusko Jaurlaritzako Industria, Trantsizio Energetiko eta Jasangarritasun sailera atxikitako URA-Uraren Euskal Agentziak eta Arratzuko Udalak lankidetza-hitzarmen bat sinatu dute udalerriko auzo sakabanatuetako isurketak saneamendu-sare orokorrera konektatzeko proiektua gauzatzeko, Zubiate tartean. Ekimen honek ingurumenaren hobekuntza eta Urdaibaiko ur-hornidura bermatzea du helburu.
Proiektuak kolektore nagusi bat eraikitzea aurreikusten du, Zubialde auzoko iparraldeko baserrietatik auzoko hegoaldean dagoen kolektorearekin konektatzeko. Horrez gain, hiru adar gehituko dira, trazaduraren inguruko baserrietako urak biltzeko. Azpiegitura PVCzko 250 mm-ko diametroko hodiekin egingo da, eta 17 putzu aurrefabrikatu egokituko dira.
Ekintzaren aurrekontua 174.796,66 eurokoa da (BEZa barne), eta URAk finantzatuko du osorik. Arratzuko Udalak obren kontratazioa, zuzendaritza teknikoa eta amaitutako lanen mantentzea bere gain hartuko ditu.
Gaur egun, Zubiate auzoko lau baserrik isurketak egiten dituzte bi puntutan, putzu septikoen bidez. Isurketek Golako eta Gorozika ibaiak kutsatzen dituzte, eta horiek Urdaibaiko ur-hornidurarako erabiltzen dira. Horregatik, premiazkoa da etxebizitza horiek sare orokorrera konektatzea.