Gernika-Lumoko Azoka plaza, datorren igandean, abenduak 21, gastronomia tradizionalaren epizentroa izango da berriro ere, Barraskiloen Euskadiko XLVIII. Txapelketarekin. Txapelketa hori bere kategoriako lehiaketa garrantzitsuena da lurraldean. Dagoeneko finkatuta dagoen hitzordua da, urtero zaleak eta espezialistak biltzen dituena herri-sukaldaritzako plater sustraituenetako baten inguruan. Saria lortzeko ehun bat kazola batzen dira.
Jardunaldia 10:00etan hasiko da, eta parte hartzeko bi modalitate izango ditu: alde batetik, aurrez etxean egindako kazolak, eta bestetik, esparruan bertan prestatutakoak. Bertan, parte-hartzaileek barraskiloak zuzenean prestatuko dituzte publikoaren eta epaimahaiaren aurrean.
Gernika-Lumoko Udalak, ekitaldia antolatu duenak, lehiaketaren oinarriak zehaztu ditu. Plazan prestatzeko modalitatean, lehiakide bakoitzak gehienez lurrezko kazola bi aurkeztu ahal izango ditu, gutxienez bi kilo barraskilo kazola bakoitzeko, eta aurrez prestatutako osagaiak erabili ahal izango dira. Lehenengo sariak 60 euro eta Gabonetako saski bat izango ditu, eta bigarrenak 40 euro.
Etxean prestatutako kazola kategorian, parte-hartzaile bakoitzak elaborazio bakarra inskribatu ahal izango du. Atal honetan sei sari emango dira gehienez. Sari nagusia ere 60 eurokoa izango da, eta Gabonetako lote bat.
Epaimahaiaren erabakia 14:00ak aldera emango da ezagutzera, eta Gernika-Lumo Euskadiko sukaldaritza-tradiziorako erreferente gastronomiko eta topagune bihurtu duen jardunaldiari amaiera emango zaio.