Lanbide Ekimenak zentroak eta SPRI Taldeak digitalizazio-ibilbidea prestauko dabe, tailer praktikoekaz eta aholkularitza personalizatuagaz, EAEko autonomo eta mikroenpresentzat.
Adimen artifizialak (AA) urruneko teknologia izateari itxiko deutso, eta enpresa-arloko eguneroko aliatu bihurtuko da. Gernika-Lumoko Lanbide Ekimenak zentroak, SPRIgaz (Eusko Jaurlaritzaren enpresa-garapenerako agentziagaz) lankidetzan, laster jarriko dau martxan “Bultzatu zure negozioa adimen artifizialarekin” programa, Euskadiko autonomoei eta mikroenpresei trantsizino digitalean laguntzeko diseinatutako prestakuntza-ibilbidea.
Proiektuak talde txikietako prestakuntza, tailer-erakusleak eta -praktikoak eta aholkularitza teknologiko pertsonalizatua konbinatuko dauz, enpresa txikiei eguneroko kudeaketan AA modu erabilgarri eta seguruan txertatzen laguntzeko. Gainera, digitalizazino-proiektuetarako laguntzak eta dirulaguntzak bilatzeko laguntza emongo dau programak.
Jon Lejarraga Ekonomia Sustapeneko zinegotziak ekimenaren garrantzia nabarmendu eban: “Gure autonomoek eta mikroenpresek lehen eskuraezinak ziruditen tresnak eskuratu ahal izatea gura dogu. Tailer horreekaz adimen artifiziala modu praktikoan aplikau ahal izango dabe, prozesuak hobetu ahal izango dabez eta gero eta digitalagoa dan merkatu batean eraginkortasun handiagoz lehiatuko dira”.
- Tailerrak Lanbide Ekimenak zentroan (Alhóndiga kalea 6, Gernika-Lumo) egingo dira urritik abendura bitartean, 10:00etatik 13:00etara:
- Urriaren 22an, “Konkista zure bezeroak Aarekin”; saioa emongo da, web- presentzia eta marketin-estrategiak hobetzeko adimen artifiziala zelan aprobetxau aztertzeko.
- Azaroaren 12an, “Atazak automatiza eta erroreak ezaba itzazu AArekin”; tailerraren txanda izango da. Tailer horrek erakutsiko dau zelan sinplifikau prozesuak eta zelan aurreztu denbora laguntzaile birtualekaz eta automatizazio- tresnekaz.
Azkenik, abenduaren 10ean, “Aztertu zure eskaerak eta proiektuak Aarekin”; jardunaldiaren bitartez adimen artifiziala erabiltzen ikasteko aukera egongo da, datuak interpretatzeko, kudeaketa optimizatzeko eta enpresa-erabakiak hartzea errazteko. Enpresa parte-hartzaile bakoitzaren instalazinoetan zalantzak zuzenean argituko dabezen teknikari espezializatuak izango dauz programak, ekimenaren ikuspegi praktikoa indartuz.
Lanbide Ekimenak zentroak nabarmendu dau ibilbide honek digitalizazinorako sarbidea demokratizatzeko aukera emongo dauela, adimen artifiziala EAEko ekoizpen-sarearen bihotza diran ETEetara eta autonomoetara hurbilduz.