Modu desberdin eta paregabea lurraldearen ondare-aberastasuna ezagutzeko, arkeologia, natura, kultura eta tradizioa uztartzen dituzten ibilbideekin.
Bizkaiko Foru Aldundiak bultzatutako ibilbide historikoen 15. edizioak esperientzia bat proposatzen du uda honetan, bisita gidatuen programazio oso baten bidez, lurraldearen historian sakontzeko. Ekainetik irailera, Bizkaia beste begirada batekin zeharkatu ahal izango da, ondare-balio handiko inguruak ezagutuz, paisaia, kultura eta ikerketa historikoa uztartzen dituzten ibilbide tematikoen bidez.
Lea eta Barbadun ibaietako ibilguen inguruko burdinaren kultura-paisaiak ezagutzeko ekainean egindako burdinoletako ibilbibideen ostean, uztailean bisitaldi-multzo berri bati ekingo zaio, lurraldeko aztarnategi arkeologiko garrantzitsuen inguruan. Urdaibai Biosfera Erreserbari protagonismo berezia emango zaio, eta Basauriko Finagako Kultura Multzoa berritasun gisa txertatuko da. Sei ibilbideren bitartez, Ibilbide Arkeologikoek Neolitikotik Erdi Arora bidaiatzeko aukera emango dute, Arrolako oppiduma, Foruko Herrixka Erromatarra, Tribisburuko Nekropolia, Ereñozarreko Gaztelua, Katillotxuko Estazio Megalitikoa edo Finaga bezalako parajeak bisitatuz, errealitate birtuala, paisaiaren interpretazioa, biologoek eta hizkuntzalariek emandako azalpenak eta zeinu-hizkuntzako bisitak barne.
Irailean, Bizkaiko Zin-bidearekin emango zaio amaiera programazioari, hau da, Bizkaiko jaunak Foruak zin egiten zituen tokietatik egindako ibilbidearekin. Ibilbideak Bilbo, Gernika eta Bermeo batzen ditu, eta oinez egin daiteke, hiru etapatan, edo autobusez, jardunaldi bakar batean, Bizkaiko ondare historiko eta nortasun politikora hurbilduz.
Ibilbide Historikoen programazio osoa eskuratu ahal da www.bizkaikoa.bizkaia.eus webgunean, 688 856 689 telefonoaren bidez edo ibilbideak@bizkaia.eus helbide elektronikoaren bidez.
Uda honetan Bizkaia zeharkatu jatorritik hasita, eta bere historia ezagutu ondare paregabearen bidez.