Foru Aldundiak bultzatzen duen Haritza izeneko proiektuaren barruan sartzen da ekimen hau. Europar Batasunaren laguntza du, EGEF Programaren bidez. Ingurune Naturala eta Nekazaritza Sustatzeko Sailak Quercus robur (bertoko haritza) espezie autoktonoaren landareak eskaini dizkie udalei. Helburua da haritzek berreskuratzea urteetan zehar Bizkaiko basoetan galdu duten espazioa.
Bizkaiko Foru Aldundiak bat egin du Zuhaitzaren Munduko Egunarekin. Urtero ospatzen da, martxoaren 21ean, eta Aldundiak 10.000 haritz-landare baino gehiago banatuko ditu nazioarteko hitzorduarekin bat egin nahi izan duten udalerrien artean. Bizkaiko Foru Aldundiak bultzatzen duen Haritza proiektuaren barruan sartzen da ekimen hau. Europar Batasunaren laguntza du, EGEF Programaren bidez.
Basoberritzeak egitea ardatz dituzten dibulgazio- eta ospakizun-jardueretan laguntzeko, Ingurune Naturala eta Nekazaritza Sustatzeko Sailak Quercus robur (bertoko haritza) espezie autoktonoaren landareak eskaini dizkie Bizkaiko udalerrietako udalei, nazioarteko hitzorduaren harira egiten diren landaketetan erabil ditzaten.
Bilketa-prozesua
2022ko udazkenean, bertoko haritzen ezkur ugari bildu ziren Bizkaian, Haritz proiektua garatzeko behar ziren landareak ekoizteko. Bertoko haritzaren ezkurra udazkenean heltzen da, normalean urrian. Heldu, eta lurrera erortzen denean, ereiteko moduan dago. Bilketa egiteko hariztiak Eusko Jaurlaritzako hazien zerbitzuak aurrez aintzatetsi eta ziurtatutako partzelak dira. Kalitate onekoak direlako eta osasun-egoera onean daudelako lortu dute ziurtagiria (hazitegi-unadak).
Bizkaian, bi hariztitan egin da bilketa. Haziak Basalanek kudeatzen duen Martintxune mintegira eraman ziren. Han, bildutako haziak garbitu, eta haietako batzuk hautatu ziren, akatsak edo usteldurak zituztenak baztertu ondoren. Hautatutako haziak negutegi batean erein ziren baso-albeoloetan (zohikatzez betetako loreontzi txikiak dira). Bertan, hazten jarraitu dute, behar zuten urari eta ongarriari esker, eta birlandatzeko tamaina egokira iritsi arte: 80 eta 120 cm artean.
Ekimen honen bidez, haritzek urteetan zehar Bizkaiko basoetan galdu duten espazioa berreskuratzea sustatzen da.