Busturiako Udaleko Osoko Bilkurak, joan dan abenduaren 18an, 2025erako 2.188.566,33 euroko aurrekontua onartu eban hasiera batean, EH Bilduren kontrako botoekaz. EAJ-PNVko gobernu-taldeak asmo handiko planteamendu ekonomiko batean lan egin dau, eta, etorkizunari begira, Busturiako herritarrek adierazitako beharrei erantzuten deutse. Helburua da kudeaketa eraginkorrari estaldura emotea, zerbitzuak hobetzeko, irisgarritasunari dagokionez be hirigintza ordenatua eta orekatua garatzeko, dinamismo sozioekonomikoa eta kulturala bultzatzen jarraitzeko eta bizi-kalidadea hobetzeko.
“Udal saneatuagaz, udalaren diru-sarreren zati bat heredautako udal-zorra kitatzeko erabili behar izan ondoren, 2025erako aurrekontuan epe labur, ertain eta luzean geure ibilbidean aurrera egiten jarraitzeko aukera emongo deuskun kudeaketa bat garatzeko baliabideak aurreikusi doguz, gure programan proposatu gendun garapen-ildoagaz eta bizilagunek helarazi deuskuguzen behar eta asmoekin bat etorriz, haiei entzun eta zor baiteutsegu”, nabarmendu dau Aitor Aretxaga Busturiako alkateak.
2025eko aurrekontua 2.188.566,33€-koa da, eta hortik 203.159.97€-ko inbersino erreala bideratzen da, gure bizilagunen egunerokotasuna hobetzeko, Busturia guztiontzako leku irisgarri bihurtzeko eta zerbitzuak bermatzeko. 71.948 euro bideratzen dira Gizarte Zerbitzuen Mankomunidadera, gehien behar dabenak zaintzea lehentasuna dalako; 8.282 euro euskararen erabileraren normalizazinoa sustatzen dauen UEMArentzat (Udalerri Euskaldunen Mankomunidadea); eta 14.712 euro Urremendirentzat, gure udalerrian eta eskualde osoan egiten diran proiektuetarako.
https://www.busturia.eus/eu-ES/Albisteak/Orriak/20250126_Aurrekontuak2025.aspx