Aurreikusita dago Eskualdeko Plan Estrategikoa aurtengo udaberrian onartzea, eta proiektu eragileen kopurua mugatua izango da
Gaur arratsaldean, Busturialdea-Urdaibaiko Eskualdeko Plan Estrategikoaren talde eragilearen bigarren bilera egin da Gautegiz-Arteagako Urdaibai Bird Centerrean. Bizkaiko Foru Aldundia, Eusko Jaurlaritza eta inguru horretako hogei udal daude talde horretan.
Taldearen bigarren topaketak 20 proiekturen atariko zerrenda bat aurkezteko balio izan du. Izan ere, proiektu horiek eragile izan daitezke eta eskualdeko erronkei eta beharrizanei aurre egiteko gaitasun eraldatzailea dute. Proiektu horien sorreran hauek daude: hasierako diagnosi-fasea, udalekiko eta inguruko beste eragile garrantzitsu batzuekiko elkarrizketak, Eskualdeko I. Partaidetza Foroa -abenduan izan zena-, eta herritarren parte-hartzea.
Inguruko udalerrietako 400 pertsonak baino gehiagok erantzun dute lineako galdera-sorta, eta adierazi dituzten ideia, hobespen eta ekarpenek gaur aurkeztutako atariko zerrenda hori aberastuko dute.
Bileran, udalek lehentasunezko proiektuen gainean daukaten iritzia azaldu dute, eta, horri esker, atxikimendu handienekoak identifikatu dira haietan sakontzeko. Bileraren ondorioak ikusita, prozesuak aurrera egingo du; horretarako, proiektuen azterketa tekniko-ekonomikoa egingo da, eta Plan Estrategikoaren Eskualdeko II. Partaidetza Foroa.
LJEak (lehentasunezko jarduketa eremuak) garatzeko erakundearteko estrategiari dagokion metodologia komunaren arabera, Busturialdea-Urdaibaiko Eskualdeko Plan Estrategikoa aurtengo udaberrian egongo da onartuta. Plan horren proiektu eragileen kopurua mugatua izango da, eta erantzun oso eta koherente bat emango diete herritarren ongizatean eragina duten eskualdeko erronkei.