Iturria: Irekia
Euskadin bikaintasun gastronomikoa eta turistikoa sustatzen duten enpresa eta profesionalen talentua, berrikuntza eta konpromisoa aitortzeko
Vitoria-Gasteiz, 2025eko urtarrilaren 13a – Euskadi Gastronomikak, 550 enpresa eta profesional baino gehiagok osatutako sareak, “Euskadi Gastronomika Sariak” sortu ditu. Ekimen berri horren helburua sare hori osatzen duten enpresa, entitate eta profesionalen lana aitortzea da. Sari horiek Euskadin turismo gastronomikoa garatzen eta indartzen lagundu duten jardunbide onenak nabarmentzen dituzte. Euskadi mundu osoan gehien estimatzen den helmugetako bat da.
Euskadi Gastronomika sarearen balioak eguneroko lanaren bidez sustatzen dituzten enpresei eta profesionalei errekonozimendu publikoa emateko beharretik sortu dira sari horiek. Sarearen balioak honakoak dira: zerbitzuaren bikaintasuna, kalitatea, benetakotasuna eta jasangarritasuna turismo gastronomikoaren esparruan.
Deialdiaren hasiera eta datak
Lehenengo edizio honetarako hautagaitzak 2025eko urtarrilaren 13tik 2025eko martxoaren 14ra arte aurkeztu ahal izango dira. Inskripzioak Euskadi Gastronomikaren webgune ofizialean eskuragarri dagoen inprimakiaren bidez egingo dira, eta sei kategoriatako proiektuak aurkeztu ahal izango dira, berrikuntza, jasangarritasuna, sustapena, eragileen arteko lankidetza eta bezeroarentzako arreta bezalako alderdiak barnean hartuta.
Parte hartzeko aukera zabala eskaintzen dute sei kategoriek. Hala nola, barne hartzen dituzte bisitariaren esperientzia hobetzeko teknologia erabiltzen duten proiektuak, turismo arduratsu eta jasangarria bultzatzen duten ekimenak eta turismo gastronomikoaren sustapena.
Ekimenari “Euskadi Gastronomika FESTA” ekitaldiak emango dio amaiera 2025eko maiatzaren 19an, Gasteizko Europa biltzar jauregian. Bertan, irabazleak ezagutaraziko dira eta Euskadiko talentu gastronomikoa ospatuko da, sektoreko eragile nagusiak bilduko dituen gala batean.