- Udalak instalazioak modernizatu ditu, eraginkortasun energetikoa, akustikoa eta irisgarritasuna hobetuz.
- Esku-hartzeak eraikinaren elementu historikoak berreskuratzen ditu, besteak beste, ‘Jesusen Bihotza’ ikastetxeko kapera zaharra.
Erdiguneko Andra Mari kalean Gernika-Lumoko turismo bulegoak ateak ireki zituela badira hogeita hamasei urte. Orain, irudi berria erakutsiko du iraunkortasuna, diseinu garaikidea eta ondarea berreskuratzea uztartuko dituen espazioaren berrikuntza sakona egin duelako Udalak.
Esku-hartzeak sistema elektrikoa modernizatu du, luminariak soluzio eraginkorragoekin ordezkatu ditu eta altzariak eta barruko pintura eguneratu ditu. Baina proiektua hobekuntza estetiko hutsetik harago doa. Erosotasun akustikoaren, eraginkortasun energetikoaren eta iraganarekiko errespetuaren aldeko apustua egiten duen erreforma da.
Gaur egungo ondarea
Atondoko apaingarria den sabai faltsua da elementu nabarmenetako bat, espazioaren akustika hobetzeaz gain, giro-argiztapen berri baten oinarri ere bada. Sarreran bertan, formatu handiko atzeraargiztapeneko panel batek (2,5 metroko altuera eta 1,5 metroko zabalera) Gernikako Arbolaren irudia erakusten du, foru-herriaren ikur identitarioa. Oinaldean, jatorrizko ur- bedeinkatu pila dago, ‘Jesusen Bihotza’ ikastetxeko kapera zaharraren aztarna, Gerra Zibilaren ondoren eraikin horretan zegoena.
Nerea Revuelta Turismo zinegotziak proiektuaren balio sinbolikoa azpimarratu du: “Bulegoak udalerriaren arima islatzea nahi genuen, historia eta berrikuntza elkarrekin bizi diren tokia. Esku-hartze horrek bisitatzen gaituztenen erosotasuna hobetzen du, gure energia-kontsumoa murrizten du eta karga sinboliko handia duen eraikinari balioa ematen dio”.
Antzinako kaperaren jatorrizko ganga ere nabarmendu da, bere forma nabarmentzeko argiztapen espezifikoa jarrita. Erakusmahaiaren atzeko horman, formatu handiko atzeraargiztatutako beste panel batek (7,5 metro bider 1,3 metro) kalitate handiko veste enklabe enblematiko batzuen irudiak erakusten ditu, hala nola Astra, Pasealekua, “Guernica” horma-irudia edo Europako Herrien parkea.
Akustikaren hobekuntza osatzeko, ehun fonoxurgatzaileak erabili dira, bai paneletan, bai altzari berrietan. Salmahaiaren eremuak zurezko akaberak eta soinu-ingurunea leuntzeko diseinatutako ehunak ere baditu.
Kanpoaldean, Artekale eta Andra Mari kaleetako fatxada eta arkupeak hobetu dira, hiri-ingurunearen izaera abegitsu eta ordenatua indartuz. Eerreforma honen bitartez irudi berrituarekin hartuko dira bisitariak, baina herriaren nortasunari leial.
1,5 milioi pertsona baino gehiago igaro dira bulego honetatik 1989an ireki zenetik. Erreforma horren bidez, Udalak sendotu egin nahi du, ez bakarrik informazio gune gisa, baizik eta iraunkortasunaren aldeko apustua egiten duen foru-herria aurkezteko gune gisa, memoriari uko egin gabe.