Udalak bi proiektu jarri ditu martxan herriko mugikortasuna eta irisgarritasuna hobetzeko, milioi bat eurotik gorako inbertsioarekin
Urbietako oinezkoentzako pasabidea berreraikitzeko eta San Juan kaleko arrapala mekanikoaren lehen zatia instalatzeko obrak martxan daude dagoeneko. Guztira milioi bat eurotik gorako inbertsioarekin, Gernika-Lumoko Udalak herritarren irisgarritasuna eta bizi-kalitatea hobetu nahi ditu.
Santa Anako aparkalekua kirol-instalazioekin lotzen duen Urbietako pasabidea iaz desmuntatu behar izan zuten, onddo xilofagoek eragindako egiturazko kalteak hauteman ondoren. Orain, 534.000 euroko aurrekontuarekin eta hiru hilabeteko egikaritze-epearekin hasi da berreraikitzen. Obren hasiera atzeratzearen arrazoia zubiaren egiturarako garrantzitsua den Irokoko egurraren eskasiak izan da. Aurrefabrikazio-fasean dagoen plataforma berriarekin, aurreikusten da pasabidea berriz martxan egongo dela uztailean.
Aldi berean, San Juan kaleko arrapala mekanikoaren instalazioa aurrera doa lehen fasearekin. Hasierako tarte horrek 25 metroko luzera eta % 10,6ko desnibela du, eta udalerriko kale aldapatsuenetako bat den honetan oinezkoak errazago ibiltzea lortuko du, batez ere anbulatoriora joaten direnak. 660.359 euroko inbertsioa egingo da, eta bost hilabete iraungo du.
Proiektu horiekin, Gernika-Lumok urrats sendoak ematen jarraitzen du hiri-ingurune irisgarriago eta modernoago baterantz, oztopo arkitektonikoak ezabatuz eta herritarren mugikortasuna hobetuz.