Kofradia-Itsas Etxeak Kantauri itsasoko atun gorriaren lehen Kaitaia eta dastaketa antolatu dauz. Ekitaldi aitzindari honek Euskadiko arrantza-, zientzia- eta gastronomia-sektoreetako ehun bat lagun batu dauz. “Kantauriko atun gorriaren bikaintasuna” lelopean, produktuaren kalidadeari eta euskal arrantza-sektoreak jasangarritasunagaz eta barrikuntzagaz daukon konpromisoari balioa emoteko balio izan dau jardunaldiak.
Amaia Barredo Eusko Jaurlaritzako Elikadura, Landa Garapen, Nekazaritza eta Arrantzako sailburuak parte hartu dau bertan, eta azpimarratu dau ekimenaren helburua dala “atunaren arrantza jasangarrirantz aurrera egitea, ezinbesteko urratsa baita produktuaren kalidade gorena bermatzeko”.
“Jasangarritasuna eta kalitatea betidanik izan dira euskal gastronomiaren berezigarri”, adierazi dau sailburuak, eta, era berean, esan dau garrantzitsua dala arrantza-kuotak zorrotz kontrolatzea, ingurunea errespetatzen daben jarduerak sustatzea eta ingurumenaren gaineko eragina minimizatzea.
Gaineratu dauenez, “proiektu honen bidez Euskadiren lehen sektorearen eraldaketa bultzatzen da, haren aurrerapenak Euskadiko ekonomia globalean eragin positiboa eta eraldatzailea izan daian”.
Itsasbalfegó ekimenak —Eusko Jaurlaritzak sustatuta, AZTI, Balfegó eta Euskadiko arrantza-sektoreagaz lankidetzan— arrantza-kudeaketa eraginkorragoa eta jasangarriagoa lortzen laguntzen dau, balio-katea sendotuta eta itsas tradizinoa barrikuntza teknologikoagaz uztartuta.
Sailburuaz gain, arrantza-arloko hainbat ordezkari izan dira ekitaldian, besteak beste, Norberto Emazabel Gipuzkoako Arrantzaleen Federazioko presidentea, Miren Garmendia OPEGIko zuzendaria eta Aurelio Bilbao OPESCAYAko zuzendaria. Gipuzkoako eta Bizkaiko arrantzaleen kofradietako ordezkariak be bertan izan dira. Roberto Pozo, AZTIko zuzendaria, Pere Vicent Co, Balfegóko presidentea, eta euskal gastronomiaren enbaxadore ospetsuak, esaterako Martin Berasategi sukaldaria, Bisubi Fundazioko kideak eta izen handiko beste sukaldari batzuk be izan dira.