Iturria: Irekia
- Leandro Azkue Eusko Jaurlaritzako Arrantzako sailburuordea: “gakoak jasangarritasuna eta jardunbide egokiak dira; gure ontziek ondo betetzen dituzte”.
Roy Clarissek, Seychelleetako Arrantza eta Ekonomia Urdineko Ministerioko Arrantza Departamentuko idazkari nagusiak, eta Leandro Azkue Eusko Jaurlaritzako Arrantzako sailburuordeak bilera izan dute gaur Indiako Ozeanoko uretan aritzen diren euskal atunontzien (gehienek Bermeon dute basea) egoera aztertzeko.
Seychelleetako artxipelagoa bertan arrantzatzen duten 13 euskal arrantza-ontziren base operatiboa da. Iaz 118.000 atun-tona arrantzatu zituzten, batez ere atun hegats-horia, atuntxikia eta atun moja barietateetakoak, kontserba-industrietara bideratuak.
Clarissek Azkueri aipatu dionez, “Seychelleetako Victoria portua euskal atunontzientzako baimendutako portu gisa izendatzen bada, horrek aukera emango du tunidoen deskargan tolerantzia-marjinaren salbuespena aplikatzeko, Europako kontrol-erregelamendu berriaren arabera”.
Victoria, batzuetan Mahé ere deitzen dena, Seychelleetako hiriburua da, Mahé uhartearen ipar-ekialdean dago eta 27 mila biztanle ditu, hau da, estatuko biztanleria osoaren ia herena.
Azkuek Seychelleen ordezkariari nabarmendu dionez, “euskal atunontzien flotak jasangarritasunarekin eta jardunbide egokiekin hartuta duen konpromisoa, zalantzarik gabe, Indiako Ozeanoko atun-sarda handiak berreskuratzen laguntzen ari da”.
“Nahiago genuke, Ipar Atlantikoan eskatzen dugun bezala, nazioarteko beste flota batzuek ere jardunbide profesional on horiek garatuko balituzte, espezieak mantentzea eta haztea bermatzeko”, nabarmendu du Leandro Azkuek. Europar Batasunak eta Seychelle Uharteek sinatutako arrantza-akordioaren helburua da Seychelleetako uretan arrantza jasangarriaren arloan lankidetza erraztea eta arrantza-baliabideak erantzukizunez ustiatzea.
Akordio horri esker, EBko ontziek Seychelleetako uretan arrantza egin dezakete baldintza batzuetan, arrantza kudeatzeko eta arrantza jasangarria sustatzeko finantzaketaren truke. Europar Batasunak eta Seychelleetako Errepublikak 2023an eguneratu zuten arrantza-ontziak Mayotte uretan sartzeari buruzko akordio hori, Indiako Ozeanoaren hego-mendebaldeko eskualde-lankidetzaren testuinguruan.
Seychelleen ordezkari instituzionala aste honetan Isabel Artime Arrantzako idazkari nagusiarekin ere elkartu da Indiako Ozeanoan jarduten duten inguraketa-atunontzi izozkailuen euskal flotarekin lotutako gaiak aztertzeko.